Lapland - Above ordinary
Sisältöön Sivun ylälaitaan Sivukartta Palaute Tulosta
 
 

Davvi-Lappi eanagoddelávva

Davvi-Lappi eanagoddelávva gokčá Anára, Soađegili ja Ohcejoga gielddaid. Eanagoddelávva gokčá buot guovlluidgeavahanhámiid ja dainna duddejuvvo dán guovllu guovlolávva. Lávas leat oktiiheivehuvvon ee. vuovdedoallo- ja boazodoalloguovlluid geavahandárbbut. Stáhtaráđđi lea nannen eanagoddeláva 27.12.2007. Eanagoddeláva vuođul gomihuvvojit guovllu ovddit guovlolávat.



Eanagoddeláva nannen sirdašuvai Birasministeriijas stáhtaráđi čoavdinláhkai, dasgo Eana- ja meahccedoalloministeriija ee. vuostálasttii láva sisdoalu dáfus guovddáš lávvamerkejumiid ja lávvamearrádusaid nannema. Nannenmearrádusastis stáhtaráđđi geahčai láva leat eanaš osiin lága mielde, muhto ii nannen Rájijovsseba ja Njellima gaskasaš mohtorgielkájohtolaga ja guđii maiddái nannekeahttá oasi boazodoalu ja eará luondduealáhusaid doaibma- ja ovddidanvejolašvuođaide guoskevaš lávvamearrádusas.

 

Davvi-Lappi eanagoddeguovllus sámiid ruovttuguvlui gullet Anára ja Ohcejoga gielddat sihke Soađegili gielddas Sámi bálgosa guovlu. Anára, Soađegili ja Ohcejoga gielddaid bálgosat earret Syväjärvi bálgosa gullet erenoamážit boazodoalu várás oaivvilduvvon guvlui (Boazodoalloláhka 2.2§). Guovllus doibmet 16 bálgosa. Pyhä-Kallio bálgosii gullevaš muhtun guovllut leat maiddái Davvi-Lappi eanagoddelávvaguovllu siste.

 

Davvi-Lappi eanagoddelávva vuođđuduvvá riikkadási guovlluidgeavahanulbmiliidda, Lappi guovlolávvii, Lappi eanagoddeplánii, dahkama áigge dahkkojuvvon čielggadusaide dálá eanageavaheamis, ealáhusain, veahkadagas, geologalaš luondduriggodagain, duovdagis, johtalusas, gávppis ja bieggafámus sihke viiddis vuorrováikkuhussii eiseválddiiguin ja berošteaddjijoavkkuid ovddasteaddjiiguin.

 

Eanagoddeláva čovdosiin boahtá hui čielgasit ovdan eanageavaheami lassin maiddái guovlluidovddidanperspektiiva ja strategiijalaš plánemii gullevaš njuovžilvuohta. Ulbmilin lea oažžut áigái dakkár čovdosiid, mat ovddidit áššiid - ii eretduvdi čovdosiid.

 

Láva máŋggalágan ovddidanavádahkan válljejuvvojedje dakkár guovllut, main leat buoremus lunddolaš vejolašvuođat ovdamearkka dihte doaimma, luonddudilálašvuođaid dahje johtalussii guoskevaš sajádaga dáfus. Dát avádagat leat ovddidanpolitihkalaš doaibmalinnját eaige ieš guovlovárremat.